هواي البر واهل البر وراعين المعنى كله
هواي العود ودهن العود وشوفة طيب الفال
هواي اللي الا من الدهر ضامه على الذله
تحزم له وفسر له من الذرعان فتال
هواي اللي الا جيته لقيت حجاج منفله
هلا وسهلا ويا مرحب بمن يلفي من رجال
هواي اسمع قصايد وبمعاني المرجله جزله
اشيل البيت فوق الراس اشيله شيلة الشال
وهواي قروم قرص الجمر جافينه على المله
وصخن من حليب نياق يطيب عكرة البال
يسوسون السوالف ما بها عورا ولا سفله
ويشرون الزعل من صاحبه باقوال وافعال
يروفون بمخاويهم ولو في خوته زله
ويرخون العذر لين ان ياخذ منه باسبال
ولامن الفجر قرب وصار النوم به فله
سمعت اذان ويا محلا صلاة بالخلا الخالي
وهذا رمث وهذا ارطى وذا ملقاط وذي دله
وهواي اني اشوف النار وحوله صفة دلال
واشوف الصبح يتنفس وفيه الشمس له طله
واشوف الذود يمشي بهون بين الطعس والجال
انا يا ناس اهوى كثرما عنتر هوى عبلة
وانا يا ناس ماني عن هواي اللي مضى سالي
المشاهدة
